Standard Bank kry nuwe baadjie

Standard Bank kliënte kan eersdaags uitsien na ’n  splinternuwe meer gebruikersvriendelike oopplan tak vir Parys wat in Julie sy deure vir die publiek sal open.
Die opgradering van die bestaande takgebou in Kortstraat sal vanaf Maandag 29 Mei  tot 10 Julie gedoen word, maar alle bankdienste sal steeds gelewer word reg oorkant die takgebou in die blou mobiele eenhede, sê die takbestuurder, Christie Henery.
Bankure bly ook onveranderd en is steeds gedurende die tyd van opgradering Maandae tot Vrydae 09:00 tot 15:30 en Saterdag 08:30 tot 11:00. Voorsiening is gemaak vir gestremdes, genoeg skadu en stoele vir kliënte. Outotellers sal ook by die mobiele eenhede beskikbaar wees.
Volgens Henery is dit die eerste keer dat só ’n  omvattende opgradering van die hele gebou gedoen word sedert die tak in 1912 hier geopen het. Vantevore is net kleiner  veranderings aangebring aan die gebou.