Eskom het vanoggend bekendgemaak dat goeie vordering gemaak word met die invordering van gelde wat deur munisipaliteite aan die kragreus verskuldig is. Van die 34 munisipaliteite wie se krag op geskeduleerde tye daagliks  vanaf Januarie 2017 onderbreek sou word as strafmaatreël om die munisipaliteite te dwing om hul agterstallige skuld te betaal, is betalings ontvang en afbetalingsooreenkomste geteken vir 21 van die munisipaliteite.

Gevolglik sal die 21 munisipaliteite se krag nie afgesny word nie, het Eskom bevestig.

Eskom se interim hoof uitvoerende beampte, Matshela Koko sê hulle is bemoedig deur die reaksie wat van munisipaliteite gekry is. Hy sê die tyd het gekom dat uitstaande skuld betaal moet word en gehou word by ooreenkomste.

Hy sê dit is in die beste belang nie net van Eskom nie, maar van die hele Suid-Afrikaanse ekonomie.

Hy waarsku egter dat Eskom die situasie streng dophou om seker te maak afbetalingsooreenkomste word eerbiedig en huidige rekeninge betaal. Sou dit nie gebeur nie sal krag summier afgesny word sonder verdere kennisgewing.