Onwettige visnette verbrand
VANDERBIJLPARK. – Visvangnette van sowat een kilometer lank is op 3 Oktober deur lede van die polisie se watervleuel uit die Vaalrivier getrek. Nadat hulle verdere ondersoek ingestel het, het hulle op die plek afgekom vanwaar die mense hul onwettige visvangbedrywighede bedryf.
//
Hulle het die kano’s en die ander visvang gereedskap gekonfiskeer en die nette verbrand.
Die nette word gebruik om groot massas visse te vang en dan te slag en vermoedelik te verkoop. Sowat twee weke gelede is twee verdagtes by die Sam Gross Park in Vereeniging deur die Barrage-polisie se taakmag vasgetrek. Hulle het sommer die visse langs die wal van die Vaalrivier geslag. Die wet op visvang bepaal egter dat jy ‘n vis slegs met ‘n hoek mag vang en dus is hierdie visvangmetode onwettig. Dit is boonop nog wreed ook omdat die vis in die net vas swem en basies versmoor omdat hy nie weer kan uitkom nie.
Die bedrywighede is ook besig om bedreigde spesies wat in die Vaalrivier voorkom, soos die grootbek geelvis, uit te roei.
Die polisie se watervleuel is egter hard aan die werk om die onwettige visvangbedrywighede in die Vaalrivier hok te slaan.
* Indien enige persoon op ‘n net afkom kan hulle dit uit die water trek en by die polisie se watervleuel se kantore by die Emerald Resort & Casino gaan afgee, of dit tot niet maak.
At Caxton, we employ humans to generate daily fresh news, not AI intervention. Happy reading!
