Die DA het sekere kwelvrae oor Ngwathe se  geldsake onder die aandag van die Ouditeur-generaal gebring. Sy amptenare is tans besig met die jaarlikse finansiële oudit van Ngwathe.
Dit nadat die nuwe Raad vir Ngwathe presies sewe weke na die munisipale verkiesing op 3 Augustus oënskynlik steeds onaktief is. Opposisielede is uitgesproke krities daaroor. Nie een van die belangrike Staande Komitees is nog formeel gevorm nie. DA-raadslid Arnold Schoonwinkel sê die DA-koukusvoorsitter, Carina Serfontein, vra weke lank herhaaldelik dat die komitees gefinaliseer word, maar sonder sukses. ’n  Nuwe Finanskomitee is veral belangrik omdat dit oplossings vir Ngwathe se enorme skuldkrisis moet vind en aanbeveel. Ngwathe skuld oor die R500m aan Eskom en miljoene meer aan ander verskaffers.
Daar is ook arbeidsprobleme wat ten beste hanteer kan word wanneer die Raad sy nuwe Plaaslike Arbeidsforumlede aanstel. Ook dit is nog nie gedoen nie.
“Ek dink die versuim daarmee is onbeholpe, dalk selfs skandalig,” sê rdl. Phillip van der Merwe (VF+), ’n  prokureur van Heilbron, wat in die vorige Arbeidsforums gedien het.
Munisipale kantore in Parys was verlede maand dae lank gesluit weens ’n onbeskermde (dit wil sê onwettige) sloerstaking, nadat werkers uitgevind het dat sekere amptenare onreëlmatig bevorder is, met groot ekstra voordele vir hulle (Gazette, 8 September). Die ontevredenes het toe dieselfde voordele geëis en die kantore van die waarnemende munisipale bestuurder beset, totdat die bevorderings blykbaar onder druk gekanselleer is.
“Ongelukkig is ons as raadslede weer deur onbeholpe amptenare in die duister gehou,”  sê rdl. Saal de Jager (Wyk 12).
Hy kla ook dat raadslede se telefoonoproepe nie beantwoord is nie, hul e-posse word geïgnoreer en dat sommige senior amptenare klaarblyklik gereeld van hul poste afwesig is.
“Dit is totaal onaanvaarbaar en ons veg nou vir stappe om sake te verbeter.”
DA-raadslede het beloof dat hulle inwoners sal inlig oor wat hulle bereik om die swak dienslewering en leë beloftes aan te spreek.