DUNDEE KZN: Umgubho wobukhosi bakwaMotaung eNquthu
People came from various provinces to attend the huge gathering.
Bekufinywa ngendololwane eNquthu esigodini saseHlathidam ngenkathi kuhlangene isizwe sakwa-Motaung jikelele namakhosi aso.
Phela okhokho bakwa Motaung bashaya ngebhande lamakhosi okuyisizukulwane sika Tholoane, phakathi kwalamakhosi bekuhambele indlunkulu ebibhekwe ngabomvu u-Morena Lehlomela Lion Hlalele nomndeni wakhe behambisana nabafowabo abangamakhosi Morena Sefatsa, Morena Moletsane, Morena Ramukhele no Morena Molete.
Inhloso yalomcimbi obeyinqophamlando yomhlangano weBataung Rekopane Annual General Meeting bekungukuqinisekisa ubumbano phakathi kwabo bonke ubuholi nesizukulwane samakhosi akwaMotaung jikelele, kanye nokuthi iNkosi uHlalele bekubalulekile ukuba azokwamukela isizukulwane sakubo esizinze lapha kwelikaMthaniya jikelele.
Kulomhlangano iNkosi iphinde yemukela ezinye izizukulwane ezihambe amabanga amade ukuzothakasela imvelaphi yazo, phakathi kwazo sibala oMndaweni basoLundi, kwaNongoma, eMgungundlovu ko-Underburg, o-Mdzawe abazinze kwelase-Swatini, o-Mdau abazinze kwelase Venda, eLimpopo nase Mpumalanga, abanye bavela kwelaseGoli, North West naseLeSotho. Yize o-Motaung bephila ngokuhlangana nyangazonke kodwa umhlangano wango mhla ka-7 November 2020 ubuyinqophamlando ngokuba ubufumbethe nomlando obahlanganisa bonke ngokwehlukana kwabo njengoba ukuqinisekisa ukuthi izibongo ezifana no-Mndaweni, Tau, Ndaweni, Mdau, Mdzawe nabanye bayisizwe sinye. Â
USolwazi u-Lintsha Philip Lion ethula inkulumo yakhe ucacise ngokuzinza koMndaweni noMotaung kwelikaMthaniya, “Kafushane ukhokho uHlalele wayeyiqhawe ngoba wakwazi ukuhlangana neSilo uShaka ngesikhathi sempi i-Zifecane ukuze kwakhiwe ukuthula, ubuhlobo kanye nobumbano. Lokho kwadala ukuba uHlalele ahlomule ngezwa wanikwa namakhosikazi wagcina isizukulwane sakhe sizinza Kwa-Zulu Natal.”
Kuye kwavela ukuthi lokhu akugcinanga ngo-Hlalele njengoba kukhomba ukuthi o- Motaung abaphila kwelase-Eastern Cape nabo okhokho babo bahlomula ngezwa kuleyandawo emva kokuba balekelela isizwe sakwaXhosa ezimpini ezithize zangaleso sikhathi.
INkosi uMolefe eNquthu nayo ebikade iyinxenye yalomcimbi ihalalisele isizwe saBataung ngobumbano yase ibagqugquzela ukuba baqhubekele phambili ngesenzo esihle sokuqoqa nokuhlanganisa isizukulwane saso.
KuloMcimbi akugcinangwa ngokifinywa ngendololwane kuphela kepha bekuhambele nabaculi be-Famo okunguMasikande waseLesotho, inhlanganisa yemdanso wesintu wezintombi zakwa-Zulu nezabeSotho, amatshitshi kanye nezinsizwa zinandisa futhi zabonakala zihuba izingoma ngenkathi zihlangabeza amakhosi azo.
See video here:
HAVE YOUR SAY: Like our Facebook page, follow us on Twitter and Instagram or email us at dundee.courier@caxton.co.za. Add us on WhatsApp 071 277 1394.
