Pionier het op Vrydag (8 November) met groot opgewondenheid en dankbaarheid vir mev Annelie Grobbelaar terug verwelkom.
Sy het byna ‘n jaar gelede nog saam met die skool eksamenvraestelle nagesien en lekker gesels, waarna Pionier verneem het dat sy baie siek is en in die hospitaal opgeneem is.
Mev Grobbelaar was amper daar vir ‘n hele jaar. Hoërskool Pionier is saam met haar gesin baie bly en dankbaar dat sy uiteindelik terug by die huis is.
“Dit was so lekker om haar tussen ons te kon hê en al die nuus met haar te kon deel wat sy gemis het. Haar gees is vir seker positief en entoesiasties: nog die ou juffrou Grobbies. Sy wil net skool toe kom en help nasien.”
Mev Grobbelaar het nog ‘n lang herstelpad wat voorlê, maar Pionier glo met die Heer se genade dat sy ten volle sal herstel.
“Ons, as personeel en leerlinge, het vreeslik na haar verlang en wens vir haar ‘n spoedige herstel toe sodat sy in 2020 weer by ons kan aansluit. Juffrou, jy is ongetwyfeld ‘n bewys dat God nog wonderwerke elke dag laat gebeur.
“Ons harte is absoluut verheug om jou te kon terug verwelkom!”
ALSO READ Pionier sê totsiens aan lojale onderwyser
Make sure you follow us on our social media platforms for regular updates
