Die Rapportryers deel hul hart met Newcastle

Die Rapportryerbeweging is ‘n nasionale organisasie wat streef na die opheffing van verskeie gemeenskappe deur middel van projekte wat hul op nasionale vlak, en ook plaaslik, daagliks aanpak.

Die Beweging berus op ’n Christelik Afrikaanse grondslag en streef daarna om nie net in Afrikaanse gemeenskappe nie, maar oral waar daar nood is, ‘n helpende hand uit te reik na gemeenskappe, organisasies en individue in nood.

Dié organisasie het onlangs ‘n draai in Utrecht gemaak as een van hul vele liefdadigheidsprojekte. Tydens hul besoek aan Huis Johanna het die RR, ‘n ruim bydra van voedselprodukte gemaak om die tehuis te help om hul laste te verlig.

Op plaaslike front het die organisasie ook hande gevat met La Gratitude Home for the aged met ‘n bydra van R38 000 om die tehuis te help om verskeie projekte suksesvol op die been te kan bring.

Vir die Rapportryers is die welstand en voortbestaan van organisasies soos hierdie van uiterste belang en daarom wil hulle ook graag ander organisasies in Newcastle en naburige dorpe aanmoedig om betrokke te raak by die organisasies.

“Ons daag graag ander organisasies in Newcastle uit om meer betrokke te raak in ons dorp. Die nood is baie hoog en dit is ons verantwoordelikheid om hierdie organisasies te help om hul goeie werk te kan voortsit,” het Johan Marais, verteenwoordiger van die RR gesê.

LEES OOK: Rapportryers tee off for charity

Buiten vir hul eie liefdadigheidsprojekte is die RR ook nou betrokke by verskeie skole in die omgewing en as deel van hul projekte hierdie afgelope maand, het hulle ook besluit om betrokke te raak by verskeie skoolprojekte in die omgewing.

Gert Ebersohn van die RR het as deel van hierdie innisiatief onlangs ook R5000 bygedra tot die voedingskemas van onder andere, Amajub Skool en Drakensberg Laerskool.

Word deel van die Rapportryers se nalatenskap van omgee en maak vandag ‘n verskil!

Also remember to visit our Facebook, Twitter and Instagram pages.