Ithalente lithe ‘chithi saka’ eNquthu
Intsha inikezwe ithuba lokuqhakambisa amathalente ayo.
Umncintiswano wokuvundulula uphinde uqhakambise amakhono obuciko eNquthu ubusezingeni, kanti namaqembu abonise ukuzimisela okukhulu.
Lomncintiswano ubuhlelwe ihhovisi lezokuvakasha kulomasipala. Ihholo i-VA Makhoba belibhuza amaqembu ahlukene okubalwa kuwo akaMaskandi, awomdlalo weshashalazi kanye nabahayi bezinkondlo. OnguMhleli walomncintiswano, uMnuz Mbuso Molefe, uthi lomncintiswano bazimisele ukuwubamba minyaka yonke ngenhloso yokuthuthukisa amakhono entsha kulendawo yaseNquthu. Uthi abagcini ngokuwavundulula amakhono kepha baphinde bawaqhakambise.”Sizoletha abantu asebecijile kulemikhakha yezobuciko ukuzosiza balekelele intsha ukuba nayo ibe ngompetha,”kuchaza uMolefe. Labo abadle umhlanganiso kumaskandi baklonyeliswa ngemali engu R8000, kwathi abaphume isibili bona bathola u-R7000.
Abaqhudelane ngomdlalo weshashalazi bathole uR3000 labo abadle umhlanganiso, kwathi abaphume isibili bathola uR2000.
Abahayi bezinkondlo bona baklonyeliswe R1000 othathe isicoco. Lowo ophume isibili uthole R700, ophume isithathu yena uthole R500.
UMnuz Molefe uthi lemali bekungeyokubasiza bahlahle indlela eyaphambili ngamakhono abo.Uchaze wathi “umaskandi nakuba wona usunawo umkhombandlela kulendawo, ubonisa ukukhula minyaka yonke ingakho siwunikelele ngemali enkudlwana,” kusho uMolefe.”Izinga beliphezulu kakhulu,”kusho uMolefe.