Silwela amalungelo abasebenzi-COSATU
Banqunyelwe ugwayi katiki abaholi besibhedlala kanye nalabo boMnyango wezeMfundo ukuba baphendule ngezikhalazo zabasebenzi zingakapheli izinsuku eziyisikhombisa.
Bagcwale izitaladi zedolobhana iNquthu abaholi benhlangano emelele amalungelo abasebenzi, i-Congress of South African Trade Union (COSATU) endaweni yaseNquthu, bephikelele eziphathimandleni zesibhedlela iCharles Johnson Memorial ( CJM) kanye nasemahhovisini omnyango wezeMfundo.
Lemashi ibiholwa amalunga eNquthu COSATU Local engaphansi kwegathsa i-Lucas Mbatha ngenhloso yokuzoqheda ukunganiliseki nokungahlonishwa kwamalungelo abasebenzi kulezi zindawo zokusebenzela. Phakathi kwalabasebenzi abaphulelwe amalungelo abo kube ngothisha bendawo okubalwa kubo nalabo akade bebambe okwesikhashana, amanesi asafunda kanye nabasebenzi abahlanza isibhedlela iCJM ngaphansi kwenkampani ezimele i-Sandawana.
Obekuhamba phambili ukungaphathwa kahle kwalabasebenzi ababalulwe ngendla, ukungakhokhelwa kwabo ngesikhathi kanye nemali abaholelwa yina engagculisi. Iziphathimandla zesibhedlela kanjalo nezasemnynagweni wezemfundo zamukele uhlu lwezikhalazo ngesizotha zathembisa ukuphendula njengoba zinqunyelwe ugwayi katiki ukuba kungapheli izinsuku eziyisikhombisa (7) impendulo ingaka tholakali.
Ongumgqugquzeli we mashi uMnuz Vusi Khoza uthe lokhu kuseyisiqalo basazo ngenelela nakweminye iminyango kahulumeni kuzolungisa indlela okuphathwa ngayo abasebenzi.