Bagcwale izitaladi osomabhizinisi abancane baseDundee naseGlencoe, kanye nabamele iDundee Transport Association, betoyizela ukuba umasipala abhekisise ukusebenza nokuhlala kwalabo bokufika abanamabhisinisi amancane kulendawo yaseNdumeni.
Lezizinhlangano okuyi Ziphilise Trading Association kanye neSithembile Small Business zikhala ngokuthi labantu abayizifiki babathathela imisebenzi njengoba bevula iziphaza yonke indawo futhi bathengise nokudla ngamanani aphansi kakhulu. UMnuz P Nyawo ongunobhala wenhlangano i-Ziphilise Trading association ubike ukuthi osomabhizini abayishuminane (14) ngaphansi kwalenhlangano awasenamsebenzi njengoba iziphaza zabo seziwile.
Uthi bona abalwi nokuthi azixoshwe izifiki kodwa azithengise ukudla okulungile kubantu njengoba nabo benza.
Okukhalisa labosomabhizinisi bathi ‘uhulumeni,okungumaspala akabakhathalele’ bafuna ukuba kubekhona imithetho ezolandelwa ilabo abasuka kwamanye amazwe bazovula amabhizinisi amancane kulendawo. UMnuz B Mthembu obengomunye walabo akade behola lemashi, uthi bafuna ukuba lababantu babhalisele ukuvula ibhizinisi babenemvume futhi kumele kube umuntu osethathwa njengesakhumuzi sakulelizwe osehlale kwelakuleli iminyaka eyishumi.
Baphinde banxusa ukuba umasipala uhlole ukuthi lababantu banayo yini imvume yokuba kuleli futhi bayayivuselela yini.
Kungesonasodwa lesisikhalazo ebebenaso. Phakathi kwezinye zezikhalazo iNhlangano yosomatekisi iDundee Transport Association nayo ibeke ezayo izikhalazo. Bathi bafuna umasipala abafakele izindlu zangasese zomphakathi erenki, amashelter ahloniphekile abantu kanye nempompi yokuphuza umphakathi njengoba ingekho renkeni yaseDundee. UMeya waseNdumeni uThulani Mahaye ehambisana nosoMlomo womkhandu uSduduzo Mdluli wamukele uhlu lwezikhalazo. Babe sebenqunyelwa ukuba baphendule ezinsukwini eziyishumi (10).