Parysenaars en besoekers aan die Vrystaatse dorp het hierdie week geleentheid om die room van die land se boerboele van 55 telers uit alle provinsies te sien by die Suid-Afrikaanse Boerboeltelersgenootskap (SABBS) se internasionale skou.

Volgens Parys Gazette word die skou op Vrydag (26 Junie) en Saterdag (27 Junie) by die AfriDome in Parys gehou.

Sowat 308 boerboele sal beoordeel word deur twee internasionale en twee Suid-Afrikaanse beoordelaars.

Só lyk program

Volgens Lititia Kruger, die voorsitter van SABBS, sal die junior-kampioenskapklasse Vrydag vanaf 08:00 tot 14:00 beoordeel word. Saterdag se program begin ook om 08:00 en sal junior en senior-klasse dan beoordeel word, met die hoogtepunt van die program – die aankondiging van Hond van die Jaar wat die middag plaasvind.

Kruger het mense genooi om te kom kennis maak met die trotse boerboel, SA se eie landras-hond. Dit is ‘n uitstekende geleentheid om te gesels met telers, te kyk na die honde wat gaan deelneem en meer te leer oor hierdie ikoniese ras.

Besoekers van Europa en Amerika word by die skou verwag en daar is selfs ‘n deelnemer uit Botswana.

Die Boerboeltelersgenootskap het 650 lede in bykans elke deel van die wêreld behalwe Antarktika.

Toegang vir beide dae is gratis vir besoekers.

“Ons kan nie wag om julle hier te sien nie,” het Kruger gesê.

Breaking news at your fingertips… Follow Caxton Network News on Facebook and join our WhatsApp channel.

Nuus wat saakmaak. Volg Caxton Netwerk-nuus op Facebook en sluit aan by ons WhatsApp-kanaal.