Resensent: Ischke de Jager
E-mail: ischke@caxton.co.za
Boek: Kokkedoor 2 Versamelresepte
Saamgestel deur: Errieda du Toit
Uitgewer: Human en Rousseau
Beoordeling: Dit herinner my aan ’n resepteboek wat spesiaal saamgestel is vir daardie tradisionele Afrikaanse-familie samekoms.
Die doel van die reeks was om die heel beste kokke in Suid-Afrika op te spoor, wat nie net met herinnering en nostalgie kan kook nie, maar ook hartskos op so ’n manier kan aanbied dat dit met trots die 21ste eeu ingedra word.
Die kookkboek bevat die watertand-resepte van die reeks en daar word al te lekker agter die skerms gekuier.
Hierdie boek sluit ook die resepte van die beoordelaars in, asook die resepte van die bekende kospersoonlikhede wat op die Kokkedoorstel ingeloer het.
Kokkedoor 2 Versamelresepte is ’n kookboek wat saamgestel is uit interessante, unieke en besonderse disse wat perfek is vir spesiale en groot geleenthede.
Dit bestaan uit tradisionele resepte, maar met ’n kinkel.
Daar is iets vir elkeen om aan te smul – soet of sout – in hierdie boek; van ligte etes tot groot maaltye.
Volgens Errieda du Toit, vertoef hierdie nuwe versameling van kos in die meer onlangse verlede.
“Die pendulum swaai van die ouwêreldse grasie en swier uit die 19de eeu tot die tong-in-die-kies-koskitsch tipies van die 1950’s: van die laaste landelikheid voor die groot verstedeliking tot die era van die inryrestaurante, vingerhappies en allegaartjies,” sê sy.
Kokkedoor 2 Versamelresepte is ’n kleurryke boek met baie foto’s. Hierdie boek bevat foto’s en kort beskrywings van die kokkedore, oftewel kokke wat bestaan uit die kinkelkokke en onthoukokke, wat aan die tweede seisoen van Kokkedoor deelgeneem het.
Dit bevat ook foto’s van wat op stel en agter die skerms tydens die opname van hierdie program gebeur het.
Dié foto’s skep moontlik die illusie dat die ”leser” homself inleef as een van die kokkedore of selfs teenwoordig is in die kokkedoor kombuis.
Elke resep dui aan wie die meesterbrein agter die spesifieke dis is. Sommige resepte gee ook ekstra wenke en raad om die dis daardie ekstra spesialiteit te gee.
Ek sal Kokkedoor 2 Versamelresepte aanbeveel vir gesoute kokke wat heelwat ondervinding agter die potte het.
Staan ’n kans om ’n kopie van Kokkedoor 2 Versamelresepte te wen, deur die volgende vraag te beantwoord: Die hoeveelste boek van die gewilde realiteitstelevisiereeks, Kokkedoor, is onlangs vrygestel?
SMS jou antwoord, die woord ‘Kokkedoor’, jou naam, area waar jy woon en epos adres na 35718.
Inskrywings is beperk to slegs Boksburg. Die kompetisie eindig op 9 September.
Die wenner sal telefonies geskakel word.
SMSe kos R1.50 elk. – @IschkeBoksburg
