Uma kukhulunywa ngemabito asesontfweni kusuke kucondvwe lamagama bantfu labaniketwa wona nababhatjatiswa. Lamagama asuke angeta kulamagama bantfwana labasuke babetse wona emakhaya.
Njengobe bekuke kwaphawulwa ligama lasesontfweni nobe lesilumbi likhombisa kuyikhetsa Inkhosi nobe kuphucuka kubantfu labangakacacelwa kahle nobe labadla ematse ebadzeshi.
Ingani phela bewusuke ungakayikhetsi Inkhosi nangabe usanelibito lesintfu kuphela lekuyintfo lengekho kubangekho. Bafundisi bebaneligunya lekwetsa umntfwana ligama lemehlo abo atawusheshe ahlangane nalo eBhayibhelini kunganakwa kutsi litsini bese lifakwa esitifiketini sekutalwa.
Labanyenti bantfu emagama abo asekhaya asekugcineni, kucaliswe ngemagama esilumbi labangawati nekutsi atsini. Akugcini lapho ngobe labanyenti betfu bacanjwa emagama eSingisi, eSifulentji, eSiputukezi nalokunye bafundisi labamhlophe. Babili batsatfu labatatiko tinchazelo talamagama abo.
Lawo magama ekutfunjwa kwetfu nekuphakulwa kwetfu kulokungekwetfu, ngiwo emagama lahamba phambili emapasini etfu. Kuliciniso mbamba kutsi ligama lami lekucala bekungeke futsi angeke kwaba leSingisi ngobe angisilo Lingisi nangeliphutsa.
Ekujuleni kwenhlitiyo yami kusilondza lesophako lesivuta ingati kutsi libito lami laketfu labukelwa phasi mitsetfo yelive nemasontfo lehambisana nekutfunjwa kwengcondvo nebumine.
Yindzaba lebuhlungu kabi lena futsi ledzinga kufakelwa tibuko. Loku sekwenta bantfu bakitsi kutsi banyembenye emagama abo asekhaya batsandze lawa esilumbi. Ngalesikhatsi sisakhula, bekuliwa kubangwa kutsi ntsanga yenu ukubite ngelibito lasekhaya esikoleni noma esontfweni.
Simanga kutsi bantfu bebangalwi uma bababite ngelibito lakhe lesilungu ekhaya noma etinkhomeni. Konkhe bekwentiwa kufucekwa imfucuta yemfundzisote yebatfumbi betingcondvo temuntfu lomnyama.
Ngubane ubika kutsi asengumfundisi eMgungundlovu ngeminyaka yabo-1970 wake washayelwa lucingo ngumzalwane wesilisa acela kubhatjatiselwa umntfwanakhe. Kulokubhatjatiswa kwalomntfwanakhe bekangafuni nangeliphutsa kutsi aniketwe lelinye ligama ngaphandle kwaleli lesintfu lametse lona yena.
Wabuye wakubeka lomzalwane kutsi uma sifiso sakhe singentiwa, yena nemndeni wakhe batawuphuma baphele eRoma. Ngubane wayitsembisa lendvodza kutsi sicelo sayo utasidlulisela kuBhishopi Lomkhulu, Hurley. Ngenhlanhla saphumelela sicelo salendvodza kepha kwabekwa umbandzela wekutsi leligama kufanele libe nenchazelo lenhle futsi lamukeleke enkholweni.
Ngaleso sikhatsi irijista yasesontfweni ngekusho kwakhe beyinetikhala temagama lamabili lekucala lesikholwa lelesibili lebuhedeni lekumele ligama lesintfu.
Asubuke lamanyala lanjena. Akugcini ngaloku lesekubekiwe ngenhla, Ngubane uchubeka atsi kwatsi antjintjene nalomunye umfundisi wavumela bazalwane kutsi kubhatjatiswe bantfwanabo ngemagama asekhaya kuphela.
Loku utsi kwenteka emva kwekukhulumisana naBhishopi Lomkhulu njengobe besekubikiwe ngenhla. Utsi batali labanyenti bakujabulela kakhulu loku. Kepha tintfo tajika nakubuya lomfundisi lebekantjintjene naye. Bacitseka bugayiwe nakabuya lomfundisi lebekantjintjene naye.
Watsi ubuka lerijista wawantjintja onkhe emagama esintfu, bafana bonkhe baba boJosepf emantfombatane aba boMary.
Kwetsa emagama esilumbi kubhacwe ngekutsi asesontfweni akugcini lapha eNingizimu Afrika kuphela. Livekati lonkhe le-Afrika linayo lenkinga yemagama esilumbi. Ntuli wake wayibeka kahle lendzaba nakatsi: Lafa elihle kakhulu ngokufika kwabelungu nenkolo yoBukristu.
Bathi uma siletha amadodakazi ethu esontweni masiwaqambe sithi ngoSibhili noBhithilizi, noMidilethi, noThilayizina. Yini yona uSibhili?Yini uBhithilizi?Yini uMidilethi?UThilayizina yena yini? Lixabana ngani nenkolo yobuKristu igama lendodakazi yami elithi Shongaziphi?
Uma uShongaziphi elanywa uNginikabani konakalani?
UNomkhosi uyinhlamba ngaphi? Ngubani othi izingilozi ziyokwehluleka ukumbiza kahle uthunjana wami zimngenise ekuphileni okuphakade ngoba ngametha ngathi nguBagcinile?
Kepha kuyajabulisa kutsi bantfu labamnyama njengobe besekuke kwabekwa ngenhla sebayawatsandza emagama esintfu. Kumele bantfu bawatsandze emagama lahambisana nengati yabo.
Kusamele sive kutsiwa kunaSipho Van Der Merwe nobe Thandazile Van Rooyen kukhombisa phela kutsi live selibuyile futsi kunekubuyisana.
