Kubuyisa Umuntfu Ekhaya
Emaswati fana naletinye tive letimnyama umuntfu nakangakafeli ekhaya uyalandvwa.
Lisiko lekulandza umuntfu libaluleke kakhulu ebantfwini labamnyama. Phela umuntfu ufuna kuhlanganiswa nebakubo.
NeBhayibhelini kuyevakala kutsi lenye indvodza yacela kutsi nayifile ematsambo ayo ayewungcwatjwa dvute nebakubo.
Kubalulekile ngesintfu kutsi likhaya lemuntfu akusiko lapho atalelwe khona kepha ngulapho kulele khona bakubo.
Kubuyisa yintfo leyentiwa bantfu labadzala ekhaya. Lokwentekako lapha kutsi kwentiwa umcimbi bese kuyiwa kuleyondzawo lapho umphefumulo wemufi waphumela khona.
Nangabe ashonela esibhedlela, kufikwe ngakulowo mbhede lebekalele kuwo abitwe ngeligama nobe emagama akhe kutsiwe sikulandzile bani. Umuntfu lomdzala ekhaya nguye lovamise kwenta loku aphetse lihlahla lemlahlabantfu, umphafa phela.
Kusukela lapho, lowo lowente lowo mcimbi
akabuki emuva futsi akacoci namuntfu.
Nakudlulwa emfuleni uyakhuluma amtjele umufi kutsi sesindlula emfuleni lotsite nyalo baze bayofika ekhaya. Kungenwa emsamo lapho kufike kushiswe impepho khona nakukhona silwane lalandvwa ngaso fana nembuti nje, kuyabekwa dvute naleyo mpepho atjelwe kutsi naku kudla kwakhe.
Emva kwaloko lelihlahla liphoswa etulu endlini bese bantfu bachubeka nekubusa ngaloku lokuphekiwe.
Naso leso silwane
siyabulawa sidliwe. Nangabe umuntfu ashone ngengoti (yekubulawa ngesikhali, imoto nalokunye), nakhona uyalandvwa kepha ucale agezwe emanceba ngembikwekutsi angeniswe ekhaya. Kulandza umuntfu loshone ngengoti nanaye ulandvwa fana nalona loshonele khashane.
Umehluko kutsi ngembikwekutsi bangene ekhaya kuhlatjwa imbuti egedeni ihlindvwe besekutsi umswane wayo lomuntfu lomdzala ugeza ngawo tandla lekungiko kugeza emanceba alololandvwako. Leyombuti ingatsatfwa iyodlelwa etihlotjeni ngobe ayingeni lapha ekhaya. Lenye ibulawa ngekhatsi ekhaya emva kwekwatisa labanikati belikhaya, tinyanya phela kwekutsi bani senimgezile emanceba abamemukele ngalembuti lenitayisho umbala nebulili bayo.
Leyo mbuti idliwa iphelele khona lapho ekhaya ematsambo ayo akaphumi.
Kubalulekile kugcizelela kutsi awukho umutsi lodzingekako nakulandvwa umuntfu.
Empeleni asikho ngisho nesidzingo sekutsi uze uye enyangeni nakubapholofethi nawuyolandza umuntfu. Lihlahla lemlahlabantfu ngulo kuphela lelisebentako.
Kungalandzi umuntfu loshone ngengoti yemoto ngiko kanye lokubangela tingoti temgwaco tandze ngendlela letingayo lamalanga ngobe labantfu bayapoka.
Manje utfola kutsi bashayeli bayaphatamiseka badale tingoti kuleto tindzawo lekunebantfu labangamange balandvwe khona.
Kungako nje kunetindzawo lapho kutsiwa khona tingoti akupheli inyanga tingakenteki ibe lendzawo ihlobile.
Ngenca yekutsi sesatsatfwa tinkholo tekufika utfola kutsi labanyenti bakitsi abasanandzaba nekulandza umuntfu loshone ngengoti,
kepha loku kunemphumela lomubi sibili.
Kungagezi emanceba umuntfu loshone ngengoti kona angisakubali ngobe phela lelo lishobolo lehlela situkulwane ngesitukulwane kangangekutsi ningaze nitsi niloyiwe ngekutsi nifele emgwacweni nobe nicedvwe ngetikhali niphele nya.
Kulisiko lesintfu kutsi umuntfu loshone ngengoti agezwe emanceba ngoba kungenti njalo nisuke nitingenisela emanti ngemsele.
Kuyefana nekutsi nitibatela tiphunti. Nanobe ningeke nife nine kepha situkulwane senu nakanjani siyohlangabetana nelitje lembetse ingubo.
Lokujabulisako lapha kutsi ngisho nalabamhlophe imbala bayaligcina lisiko lekulandza umuntfu nanobe
indlela yabo yehlukile kuleyetfu kepha nakungacashelwa lapho kwenteke khona ingoti bayeta netimbali.
Futsi etindzaweni letinyenti beta njalo badzimate bakhe nelitje lesikhumbuto ibe lowo muntfu amange angcwatjelwa lapho.
Tiphambano letigcwele imigwaco yakitsi, tingiyo kanye indlela Belumbi labalandza ngayo bantfu bakubo labashone
ngengoti.
