Sekunyenti lesekuke kwabhalwa bemaphephandzaba ikakhulu lawa labhala ngesilumbi mayelana nekutsi umhlanga uyini. Lokubuhlungu kutsi sive sati lekungesiwo emaciniso ngemkhosi wemhlanga.
Ngisho seMaswati imbala sewuke uve umtali atsi mine wami umntfwana angeke nani ayogeca umhlanga ngobe Inkhosi itamkhetsa kwazithinithini. Lawa ngemanga laphindziwe angeke nani Inkhosi ikhetse inkhosikati emkhosini wemhlanga.
Lekwentekako futsi kulisiko leMaswati kusti Inkhosi ivete esiveni liphovela layo. Liphovela phela kusuke kuyinkhosikati lesevele isesigodlweni sikhatsi kepha isengakatekwa manje ivetelwa sive kutsi siyibone.
Kungako uyitfola isemgceni losembili futsi inebantfwabenkhosi. Umkhosi wemhlanga akusiwo weNkhosi kepha weNdlovukati. Phela kusita laba lesebadla ematse ebelumbi, Inkhosi ayimane iteke nobe ngusiphi sibongo manje-ke nakungatsiwa Longangelive lakhe ukhetsa emhlangeni kungaba yini.
Loko kungaba kufa kwelive ngobe ingatingenisela emanti ngemsele. Kuhle bantfu babute labangakwati bangacefuti emanga laluhlata batsi emhlangeni Inkhosi ikhetsa inkhosikati. Cha bekunene akunjalo futsi angeke kuze kube nentfo lefana nalena esiveni seMaswati.
Umhlanga ngumkhosi lowentelwa kukhombisa inhlonipho kuMhlekazi, Indlovukati phela. Umkhosi wemhlanga ungumcimbi weBenguni. Umhlanga ugidvwa ekupheleni kweNgci nobe ekucaleni kweNyoni.
Kungumcimbi lowetsanyelwa tingabisa letisuka kuto tonkhe tigodzi taKaNgwane ngisho naseSikhwahlande imbala lekufaka iMpumalanga, iGauteng kanye neKaZulu-Natal .
Tingabisa tisuke lapha titewugawula umhlanga kuyowakha liguma leNdlovukati esigodlweni. Lona ngumcimbi lowetsanyelwa ikakhulu ngulabasikati, ingani tingabisa tisuke tivunule indlamu, tibunu titihlalele ebaleni. Kepha kubakhona nemajaha lagadza letingabisa.
Sigodzi nesigodzi sikhipha emajaha lekunguwona atawenta siciniseko sekutsi nakakhona lohlatjwa kugula kulelibutfo laMhlekazi atfole lusito ngekushesha. Akukho mnyaka lobekiwe kutsi kumele ingabisa ibe nganani kepha ngalokuvamile kuba ngemantfombatane lasukela eminyakeni lelishumi nakutsatfu kuye kulelishumi nesishiyagalolunye.
Kepha kuyenteka nalabancane kunaloku nobe labadzadlane bangenele nabo umhlanga.
Lokubalulekile kutsi wonkhe longenele kumele abe yintfombi ntfo. Ingani phela kuyatiwa kutsi nawungageca umhlanga kantsi sewuke wawetwa kuyonakala.
Ngeliviki lekucala tingabisa tigeca umhlanga etindzaweni letikhonjiwe. Tingabisa letindzadlana tihamba libanga lelidze kuyogeca lomhlanga, kutsi leti letisenetimphumamlotsa tona tigece dvutane.
Licophelo lalomcimbi liba lapho tingabisa setimikisa umhlanga esigodlweni seNdlovukati setihlobe tiphelele. Lapha-ke leti lesetetsenjisiwe tibonakala ngemibala letsite. Bantfwabenkhosi bona babonakala ngekufaka emagwalagwala etinhloko, bahola letingabisa kugidvwa kuyoniketwa Indlovukati lomhlanga.
Letingabisa tihlukana ngemacembu alapha tisuka khona, kantsi nekugiya kwato akufani. Ngulelo nalelo libutfo linetingoma talo kanye nendlela leligidza ngayo.
Phela onkhe asuka afuna kugidza adlule lamanye. Tigidza tindlule tiyewungena ngemuva esibayeni lapho uyolahlwa khona lomhlanga. Kutsiwa nangabe kukhona lokushaya emanti lesekwentiwa nguleyo ngabisa, umhlanga wayo uyabuna.
Loku kulihlazo lelibi kabi lelikhombisa kungcola nekungatiphatsi kahle kwaleyontfombatane. Emantfombatane lamaningi aphatsa emathoshi kukhombisa kutsi bebawugeca ebusuku lomhlanga.
Ngelilanga lekugcina, tingabisa tigidzela Indlovukati bese umcimbi uphela ngekutsi kudliwe kubuswe. Tibukeli tivumelekile kuyewubuka umhlanga kepha atilokotsi nangeliphutsa titsintse letingabisa. Tigcina ngekudla ngemehlo.
Kungena kweNkhosi enkhundleni igiye kuluphawu lwekubonga lelibutfo letintfombi letitewuhlonipha
