Presies nege maande nadat Patricia Smit se gestremde seun, Willem Esterhuizen (25), op sy fiets raakgery is, is haar ander seun, Gert (23) ook verlede Donderdag raakgery.
“Net soos Willem, het dit op die 25ste op ’n Donderdag gebeur!”
’n Mens kan die moedeloosheid in haar stem hoor as Patricia hartseer sê dat Willem tot nou toe nog nie ’n operasie kon ondergaan het aan sy gebreekte enkel nie.
Willem het karre opgepas en het dit gehelp om die pot aan die kook te hou in die huis. Hy kan egter sedert die ongeluk op 25 Oktober 2023 nie werk nie.
Sy was buite haarself van skok en ontsteltenis toe sy die nuus kry dat haar ander seun ook raakgery is op sy fiets.
Hy is raakgery op die hoek van Mandelarylaan en Suidstraat.
“Gert het gelukkig nie breuke opgedoen nie, maar hy het spierbeserings opgedoen. Hy gaan in Augustus begin met fiseoterapie op sy been en skouer.”
Gert is afgeboek tot volgende Maandag, maar het Patricia geen idee hoe haar kind, wat tans die hoof broodwinner in die huis is, by die werk gaan kom nie.
Alhoewel Patricia ook werk, verloor sy elke keer ’n dag se salaris as sy moet afvat om Willem dokter toe of Middelburg- of Witbank Hospitaal toe moet neem.
Verlede week moes sy weer reël om Gert by die Middelburg Hospitaal te kry.
• Alhoewel Gert sal kan werk, weet sy nie hoe hy by die werk, wat ver van hul huis af is, gaan kom nie.
“Sy fiets is onherstelbaar beskadig en ons kan eenvoudig nie bekostig om ’n ander een te koop nie. Is daar nie dalk iemand wat net ’n ou fiets het wat in die motorhuis rondstaan, wat Gert sal kan gebruik nie?” het sy gepleit.
• Enige persoon wat hulle moontlik kan help, word gevra om Patricia te skakel by 073 896 6957.
Lees ook:
Vrou wat gestremde seun raakgery het, gaan meld aan by polisie
X-strale wys seun wat van fiets af gery is, se enkel is gebreek
