Die man wat etlike dae in die intensiewesorgeenheid van die Life Midmed Hospitaal behandel is na ’n ongeluk sterk nou tuis aan.
Mnr. Roelof van Zyl, wat werk as burgerlike by die finansiële afdeling van die Mhluzi Polisiestasie, is laat verlede week uit die hospitaal ontslaan.
’n Ooggetuie van die ongeluk, me. Leonie Victor, het later gesê dat sy haar voertuig vinnig in trurat moes sit en agteruit ry, anders sou die bakkie, wat in die kruising met mnr. Van Zyl se voertuig gebots en omgeslaan het, haar voertuig getref het.
Lees meer hier:
Vrou sien ongeluk in kruising gebeur
Mnr. Van Zyl is per ambulans na die Life Midmed Hospitaal geneem waar hy behandel is vir bloeding op die brein en vyf gebreekte ribbes.
Tydens sy behandeling in die hospitaal het hy ook ’n infeksie in sy longe gekry.
Sy vrou, adj. Petro van Zyl (polisielid) meld dat hulle sy herstelproses by die huis “dag vir dag vat” en dat hulle “sy longe mooi oppas.”
Hy sal eers weer in Julie maand kan terugkeer werk toe.
• Adj. Van Zyl wil graag elke persoon wat op die toneel gehelp het, asook die personeel van die Life Midmed Hospitaal en almal wat hulle sedertdien ondersteun, van harte bedank.
