Mike Bolhuis se span help soek na Anelia
Die bekende privaat speurder, Mike Bolhuis en sy span, help nou soek na die vermiste Anelia Lubbe.
Anelia, ’n oud-Middelburger, het op 13 Oktober vanaf die dorpie Dominionville (Noordwes) verdwyn.
Mike, van die SSS (Specialised Security Services) Kuber Taakspan, het vanoggend bevestig dat hulle gaan help soek na Anelia.
Hy het gesê dat Anelia se stiefpa, Hannes Bester, op die veterane spesiale magte groepe (soos die valskermspringers waarvan Hannes deel was) die boodskap geplaas het dat sy verdwyn het.
Een van hul lede het vir Mike, wat die administrasie van al die groepe hanteer, gesê dat die familie hulp benodig.
“Die familie het ons aangestel en my hoof ondersoekbeampte, Odette van Staden, sal self die ondersoek hanteer.”
• Anelia het ’n litteken op haar lip wat persone gewoonlik het wat ’n gesplete verhemelte met geboorte gehad het.
Sy het bruin en grys hare, haar voorste tande is uit, daar is twee tatoeërmerke van dolfyne weerskante van haar naeltjie en daar is ’n tatoeërmerk van ’n draak op haar regterblad.
As enige persoon die ondersoekspan kan help met inligting, bel Odette by 064 700 3023.
• Odette het reeds by die polisie navraag gedoen vir ’n vermiste persoon saaknommer, aangesien die familie nog nie ’n saaknommer gekry het nie.
Lees ook:
