R10 000 beloning om motorfiets terug te kry

Die motorfiets en fiets is gister (20 Augustus) in die vroeë oggendure in AG Visserstraat (Gholfsig) gesteel.

Me. Letitia Kruger sê die boewe moes tussen 02:00 en 05:00 in haar erf gewees het, want sy het kort voor 02:00 eers gaan slaap.
Die booswigte het toegang verkry tot die erf deur die hek van die spoor af te tel en oop te skuif.

Daarna het hulle by die lang oprit ingegaan, ook ’n middelste hek langs die huis oopgeskuif en die motorfiets en fiets uit die motorhuis gesteel.

Lees ook: VIDEO: Three suspects loose after break-in

Wat haar dronkslaan, is dat haar twee groot boerboele, wat by haar in die kamer geslaap het, nie wakker geword het nie. Die diewe het langs haar kamer verbygeloop na die motorhuis en weer uit.

Die motorfiets se battery was pap en hulle moes dit stoot. Sy het gemeld dat hulle die voetspore en spore van die motorfiets gevolg het tot by die substasie in Totiusstraat. Daar het ander voertuigspore aangedui dat die motorfiets en fiets opgelaai is.

•Dit is ’n KTM 990 Super Duke swart en oranje motorfiets, registrasienommer JVF603MP.

•Die fiets is ’n rooi en swart Raleigh bergfiets.

•Inligting kan deurgegee word aan me. Kruger by 082 874 6212.

•Daar was ook ’n huisroof op Marble Hall en ’n wit Opel Corsa met registrasienommer DHX 321 L is gesteel.