KYK – Motorhuis in vlamme terwyl egpaar rugby kyk

’n Motorhuis het Saterdag onverklaarbaar aan die brand geraak in Zuidstraat.

Daleen Naudé

August 12, 2019

“Middelburg se brandweer is tops, want binne minute vandat ek gebel het, was hulle daar en het die brand geblus,” het me. Leo Whitfield gesê.

Sy sê sy en haar man, Ray, was omstreeks 17:00 besig om rugby te kyk, toe hulle eers hul hondjie en later die bure se honde hoor blaf.

Me. Whitfield sê die oomblik toe sy buite kom (omstreeks 17:15), het sy gesien die rook borrel by die luggaatjies van die motorhuis uit.

Sy het dadelik haar broer, Gert Human (by wie hulle die huis huur), gebel, en sekondes later die brandweer ontbied.

Me. Whitfield sê hulle het die motorhuisdeur probeer oopkry om die tuinslang uit te haal, maar dit was reeds beskadig met die brand.

Teen hierdie tyd het talle inwoners in die straat, asook noodgroepe, die brandweer en paramedici van ER24 opgedaag.

Sy het bewerig gevoel weens die skok en paramedici het haar bloeddruk en hartklop geneem om seker te maak alles is reg.

•’n Voertuig, wat naby die motorhuis gestaan het, se bestuurderskantruit is gebreek sodat dit weggestoot kon word, om seker te maak die brand versprei nie na die voertuig nie.

•Niemand is tydens die brand beseer nie en Middelburg Brandweerlede is vanoggend na die huis vir ’n ondersoek om te bepaal wat die brand kon veroorsaak het.