Opvolg: Is Frikkie regverdig verhoor?

Lutzkie se skuldigbevinding, en veral die feit dat hy skuldig gepleit het op die aanklagte teen hom, het vir baie as skok gekom.

Tydens ‘n telefoongesprek, voor sy inhegtenisname, het Lutzkie met die Middelburg Observer geprtaat oor die Doddieburn helikopterongeluk.

Hy het volgehou dat hy nie enige wette oortree het nie en in die belang van die gemeenskap opgetree het toe hy die wrak begrawe het.

Lutzkie, het volgens ‘n betroubare bron, die Maandag van sy inhegtenisname vrywillig na Zimbabwe gegaan om probleme en misverstande te probeer uitstryk nadat hy in kontak met owerhede daar was.

Hy het hom vrywillig onderwerp aan ondervraging en is nie deur knap polisiewerk op die lughawe gearresteer soos daar algemeen berig word nie.

Nadat hy ingeneem is vir ondervraging is mnr. Lutzkie vir dae aangehou.

Sy regspan het volgens die bron gespook om duidelikheid te kry oor wat die presiese aanklagte teen hom was.

Met verbysterende spoed is hy binne twee dae aangekla, verhoor en gevonnis op 14 aanklagte.

Plaaslike prokureur en oud-landdros Derick van Wyk het gesê dat dit algemene kennis is dat die regstelsel in Zimbabwe heeltemal in duie gestort het.

“Niemand kan ‘n regverdige verhoor in Zimbabwe verwag nie. Frikkie sou nooit een gekry het nie.”