News

Man kritiek na kar deur muur ry

“Dankie Here my kind leef nog na daardie verskriklike ongeluk.”

August 12, 2019

Daleen Naudè 2 minutes read

Mnr. Anton van Aswegen wat ernstig beseer is in ’n ongeluk Vrydagaand in Zuidstraat.

Dit is die woorde van me. Yvonne Pieterse op die tiende dag dat haar seun, Anton van Aswegen (33), in die intensiewe eenheid van die Life Midmed Hospitaal lê.

Mnr. Van Aswegen, ’n dieselwerktuigkundige van Khutana Hydraulics, het ernstige beserings opgedoen in ’n ongeluk op 2 Augustus in Zuidstraat.

Volgens sy suster, Angelique, was hy op bystand en was op pad huis toe, toe die ongeluk tussen 19:45 en 20:15 naby Central Melk en Gas plaasgevind het.

“Ons weet net dat hy beheer oor die voertuig verloor en dwarsdeur ’n muur gery het.”

Mnr. Van Aswegen moes met die kake van lewe uit die wrak bevry word.

Hy is aanvanklik in die Middelburg Hospitaal opgeneem, aangesien hy sedert die ongeluk weens breinbeserings sy bewussyn verloor het en nie kon bevestig dat hy ’n mediese fonds het nie.

Mnr. Van Aswegen is dieselfde aand oorgeplaas na die Life Midmed Hospitaal, waar hy sedertdien aan ’n ventilator gekoppel is.
Angelique het gesê dat hy ernstige brein-, skouer-, arm-, been- en voetbeserings opgedoen het en dat sy toestand kritiek is.

Sy bobeen is onder andere vergruis en daar kon verlede week geopereer word nie, weens sy ernstige breinbeserings. Die plan is om more te opereer.

Die familie vra dat enige ooggetuies van die ongeluk hulle moet kontak by 082 697 8791. “Ons wil net weet wat gebeur het.”

•Hulle wil graag die brandweer, ambulans- en insleepdienste en die personeel van die Middelburg en Life Midmed Hospitale bedank vir hul puik diens. ’n Spesiale woord van dank gaan aan die personeel van Khutana Hydraulics en elke persoon wat hulle tans ondersteun.