Die Laeveld is dalk nie deel van die Grand Prix-kringe nie, maar ‘n kuiertjie deur Max Verstappen, of eerder sy renmotor, was ons darem beskore!
Laevelders en Formule 1-aanhangers het Maandag, 20 November, die geleentheid gekry om die enjinkamer agter dié wêreldkampioen van naderby te beskou.
‘n Replika van Verstappen en Sergio Perez se Red Bull-span F1-renmotor is by Caltex Riverside ten toon gestel. Dit was nou wel nie die ware Jakob nie, maar so ná aan dit as wat jy sal kan kry.
LEES OOK: Die Laeveld nou Pieter Rischmüller se verhoog
Die kar is gebaseer op die 2019-model en het ses silinders, weeg slegs 150 kg, het ‘n 1600-enjin en het 900 perdekrag.
Verstappen het Sondag met so ‘n einste motor die Las Vegas-resies van die Grand Prix in styl gewen.
Die laaste besigtigingstyd vir dié renmotor was 18:00 Maandagaand, waarna dit na die Star Shop by Milly’s verskuif is.
Vir die petrolkoppe, ingenieurs, F1-aanhangers en klein seuntjies met groot drome het die week vir seker op ‘n hoogtepunt begin!