’n Geliefde gr. 1-onderwyser van Laerskool Lydenburg is op Dinsdag 6 Februarie net na middag dood weens ’n motorongeluk op die N14-afdraai in Centurion.
Michelle Nel (30) was op kraamverlof.
Volgens die Community Emergency Response Team (CERT), ’n gemeenskapsnoodreaksiespan, is hulle na die toneel ontbied. “Ons Centurion-span het Dinsdagmiddag reageer op ’n botsing op die N1-suid, net verby die Brakfontein-wisselaar in Centurion. Met ons aankoms op die toneel het ons ’n sportnutsvoertuig gekry wat omgeslaan het en oor twee bane van die snelweg gelê het,” het CERT in ‘n verklaring gesê.
Nel, haar ma, Barbara du Plooy, en haar tweejarige dogtertjie, Carli, was almal saam in die motor toe die ongeluk plaasgevind het.
Na wat verneem word is Nel uit die voertuig geslinger. Sy en haar ongebore baba het ernstige beserings opgedoen. Haar ma en Carli het geringe beserings opgedoen en is op die toneel behandel.
“Ondanks onmiddellike mediese aandag het ’n swanger vroulike pasiënt tragies aan haar beserings beswyk voordat sy per helikopter na ’n vlak 1-traumafasiliteit geneem kon word,” het CERT verklaar.
Die omstandighede rondom die ongeluk is steeds nie duidelik nie.
Nel sou in Maart geboorte skenk aan haar en haar man, Jaco, se babaseuntjie, Christiaan.
Sy was vir die afgelope twee jaar ’n onderwyser by Laerskool Lydenburg.
In ’n roerende boodskap op Facebook het haar niggie, Silvia Oliveira, hulde aan Michelle en klein Christiaan gebring. “Dit is met ’n swaar hart dat ek hierdie skryf. Gister het ons twee pragtige siele in ’n tragiese motorongeluk verloor. Michelle Nel, ons geliefde niggie, en haar ongebore babaseuntjie, Christiaan. Vandag voel dit soos ’n aaklige droom, maar ongelukkig is dit waar.
“Ons harte gaan uit na Michelle se man Jaco en hulle dogter Carli, Michelle se ouers Barbara en Mathys du Plooy, haar broer Dewald, ouma Ann Bruyns, en oom Gerrie, asook al hulle familie en vriende. Ons enigste troos is om te weet dat sy ’n gelowige was en dat albei van hulle nou veilig in die arms van ons Here en Verlosser, Jesus Christus, is.
“Ons gaan jou verskriklik mis, Michelle, maar weet dat ons eendag weer saam sal wees,” het die inskrywing gelei.
Aangesien die presiese omstandighede rondom die voorval nog onduidelik is, het wetstoepassingsowerhede ’n ongeluksondersoek begin om die besonderhede vas te stel. Dit is ook nog nie vasgestel wie die voertuig bestuur het nie.
Die familie kon nie dadelik vir kommentaar bereik word nie. Die begrafnisreëlings sal later van tyd bekendgemaak word.
