Reusesportdag vir Lydenburg se kleingoed
Ouers, oupas, oumas en die onderwysers van sewe kleuterskole het 'n atletiekdag terdeë geniet.
Die groot dag het op 9 September plaasgevind en hope gelag, gespeel, aanmoediging en hande klap op Hoërskool Lydenburg se rugbyveld gelewer.
Die kleuters moes onder meer sandsakkies op hul koppe balanseer, hekkies hardloop, aan verspring deelneem en met skopfietsies ry. Dit was maar net ‘n paar van die items. Die kleuters het ook vir die finale item van die dag resies gehardloop.
Gewoonlik kry elke kleuterskool jaarliks ‘n beurt om die dag aan te bied. Vanjaar was die eerste jaar wat al sewe kleuterskole saam die dag beplan en aangebied het.
Die skole was Purple Pepper Pre-Primêr, Genies Preschool, Higher Tides Montessori Academy, Lydenburg Pre-Primêr van Laerskool Lydenburg, Dwergieland, Turning Tides Montessori, Babbelkousies en Woelwaters.
Die groep skole en ouers bedank graag die borge wat ruim bygedra het om die dag ‘n sukses te maak.
