Dansers bekoor gehoor by vanjaar se Eisteddfod
Leotards en tutu's was Maandag aan die orde van die dag toe daar met die dansafdeling van die Nelspruit Eisteddfod afgeskop - en deur die dansers ook opgeskop - is.
MBOMBELA – Die dansers het gedraai en geswaai om beoordelaar Pinto Ferreira vanaf die Communio-kerk se verhoog te beïndruk en het tot vandag kans om dit reg te kry.
Tydens sy replieklewering het Ferreira die deelnemers aangemoedig om die gehoor by hulle dans te betrek deur hulle in die oë te kyk. Hy het ook gesê dansers moet onthou om energie in hul bewegings in te sit en elke oomblik ten volle te geniet.
Vir hierdie spesifieke afdeling was daar 325 inskrywings en 640 deelnemers. “Dit gaan baie goed. Ons is dankbaar vir die groot verskeidenheid dansvorms wat vanjaar hier is,” sê eisteddfod voorsitter Thea Möller.
LEES OOK: Afrikaanse drama vier fees op eisteddfod verhoog
Van die genres waaraan deelnemers kon meeding, was kontemporêr, hip-hop, modern en ballet, en in die meeste genres kon deelnemers indivudueel, in pare of in groepe optree.
Die volgende afdeling wat Maandag begin, is Engelsdrama en sluit items soos voordrag, gedramatiseerde prosa en poësie, monoloë en groeps-toneel in.
LEES OOK: Die 2018 Nelspruit Eisteddfod skop af
