TZANEEN – Dr. Alex Revelas, ‘n plaaslike ortopediese chirurg is in die intensiewesorg-eenheid na hy op sy plaas deur ‘n pofadder gepik is.
Die voorval het laat Saterdagaand op Revelas se plaas naby Thabazimbi plaasgevind. Hy is Sondagoggend van Thabazimbi Mediclinic met ‘n helikopter na die Kloof Hospitaal in Pretioria oorgeplaas.
Volgens Laura, Revelas se vrou, is haar man gered omdat hy reeds by die Thabazimbi Mediclinic ‘n teengif kon ontvang voor hy oorgeplaas is.
Jennifer Visagie van dr. Revelas se spreekkamer op Tzaneen, het Dinsdagmiddag aan die Herald bevestig dat hy steeds in die intensiewesorgeenheid is en dat die dokters sy toestand deurlopend noukeurig dophou.
“Die pasiënte en prosedures wat by dr. Revelas vir die nabye toekoms geskeduleer is, is uitgestel en enige noodgevalle word deur die ongevalle-eenheid by Tzaneen Mediclinic hanteer,” sê sy.
“Daar is baie oproepe van mense wat omgee vir dr. Revelas. Laura is by hom in die hospitaal, maar op die oomblik glo ek nie sy familie kry kans om al die oproepe te neem of aan almal terugvoer te gee nie, hy is egter in baie goeie hande,” sê sy.
