Swartmamba pik slangvanger
Gideon Vorster, ‘n 21-jarige slangvanger van Tzaneen, is verlede week Donderdag deur ‘n swartmamba gepik toe hy uitgeroep is na ‘n toneel in Nkowankowa waar die slang in die dak van ‘n huis geskuil het.
![](https://images.caxton.co.za/wp-content/uploads/sites/113/2022/02/WhatsApp-Image-2022-01-13-at-10-780x470.jpg)
“Ons het opgemerk dat die slang besig was om uit te werp en merke op het. Ons was nie seker of hy wel seergekry het terwyl hy in die dak was nie. Ons moes eers ondersoek instel voordat ons hom kon vrylaat,” sê Gideon. “Dit was ná hierdie proses dat ek deur die slang gepik is.”
Gideon sê hy is 13:40 gepik en is deur sy mede-slangvanger, Richard Max Radue wat saam met hom was, na die hospitaal gehaas. Dit was eers by die hospitaal dat hul besef het hy twee keer op die hand bygekom is. Hy is deur dr. Gary Middleton by Mediclinic Tzaneen se noodgevalle behandel en is later in die hoësorgeenheid opgeneem. Hy is Vrydagmiddag ontslaan.
![](https://images.caxton.co.za/wp-content/uploads/sites/113/2022/02/273740739_413621003892605_4054417665315468913_n-225x400.jpg)
Lees ook: Snake repellents questioned
Die Herald het verlede week oor Gideon se werk berig. “‘n Mens moet onthou dat slange wilde diere en onvoorspelbaar is en hierdie situasie was ook ‘n ongelukkige voorval buite my beheer,” sê hy. Gideon het die personeel by Mediclinic Tzaneen se noodgevalle, die hoësorgeenheid en die algemene saal bedank vir die behandeling wat hy ontvang het.
![](https://images.caxton.co.za/wp-content/uploads/sites/113/2022/02/273728151_413620953892610_8532093039146043945_n-300x400.jpg)
Hy het ook vir Richard, Arno Naude en Pieter Swanepoel bedank vir hul mediese bystand. “Laastens, en die belangrikste, is ek baie dankbaar teenoor God en al die gebede,” sluit Gideon af.