Avokado-uitvoere onder druk

‘n Ooraanbod avokado’s op die buitelandse markte kan toegeskryf word aan buitengewoon groot oeste in Peru en uitvoere van Israel, Morocco en Spanje wat laat op die markte is. Avokadoprodusente in Peru het vanjaar ‘n baie groot oes gelewer en rekordgetalle uitgepak. Peru, wat hoofsaaklik die Hassvariëteit uitvoer, het die afgelope twee weke 5 597 000 (bykans 5.6 miljoen) 4kg-kartonne avokado’s gelewer aan markte in Europa en die Verenigde Koninkryk (VK).

Suid-Afrikaanse avokadoprodusente het sedert die oesseisoen afgeskop het, einde Maart reeds 8 436 000 (8,4 miljoen) kartonne uitgevoer na Europa en die VK en dit blyk dat die beramings van 15,5 miljoen 4kg kartonne in totaal uitvoer vir 2022 wel bereik sal word. Verlede week is 637 000 4kg na Europa kartonne uitgevoer vanaf Suid-Afrika en sommige produsente laat vrugte langer aan die boom hang met die hoop dat die markpryse sal verbeter.

Lees ook: Fabco works to commercialise cassava as root veggie

Die groot rolspelers wat tans avokado’s uitvoer na die Europese markte en dié van die VK sluit in Colombië, Peru en Suid-Afrika. “Die plaaslike avokadomark is ook taamlik vol, maar pryse hou onder die omstandighede relatief goed,” vertel Garrett. Die oesseisoen is reeds vir vroeë produsente verby, maar is tans in volle swang hier in Tzaneen en die Laeveld.

Limpopo en Mpumalanga verteenwoordig meer as 80% van Suid-Afrikaanse avokadoprodusente. 49% van alle avokado-plantasies in Suid-Afrika is in die Letabastreek volgens SAGAA se 2021 sensus-beramings. Daar is tans 15 439 ha avokado’s geplant in Suid-Afrika en ‘n beraamde 800 ha word per jaar addisioneel aangeplant.

Volgens Garret bly hawens steeds ‘n probleem met vertragings en uitdagings om uitvoervolumes te hanteer, maar dat vraghouertekorte nie die avokado-uitvoere hinder nie. Daar is ook gerapporteer dat daar hierdie seisoen ook vanaf Maputo se hawe avokado’s uitgevoer is.