Voetsek boelies! Noordskool-leerders bemagtig
Laerskool Krugersdorp-Noord en AfriForum het 'n teenboelieveldtog gehad.
AfriForum se teenboelieveldtogspan en hul gelukbringer, Matteus, het onlangs besoek afgelê by Laerskool Krugersdorp-Noord.
Volgens AfriForum se jeugleierskap bestuurder Leandie Bräsler, het hulle ‘n boeiende boodskap teen boeliegedrag aan die skool se 970 leerders oorgedra.
“Dié gesprek vorm deel van Nasionale Kinderbeskermingsweek, wat tussen 29 Mei en 5 Junie gehou word om bewusmaking oor kinders se regte en veiligheid te skep. Die opvoedkundige aktiwiteite wat deur AfriForum aangebied is, het dié leerders bemagtig om boeliegedrag te herken en daarteen op te staan,” het Leandie gesê.
Departementshoof by Noordskool, Wessel Lotter sê die skool is trots daarop om deel te wees van hierdie bewusmakingsweek.
“Ons het die heel week ’n reeks aktiwiteite wat ons gebruik om leerders se bewustheid oor boeliegedrag te verbeter en hulle leer hoe om op te tree om boeliegedrag hok te slaan,” het Wessel bygevoeg.
Leandie het bygevoeg dat hul boodskap inslag gevind het by die leerders, waar dit geïnspireer was deur die konsep van die volle wapenrusting van God.
Projekassistent vir onderwys by AfriForum, Tania Scheepers sê dat veilige skole bou ‘n veilige toekoms, en dat hul wil hê dat elke leerder moet weet hoe om boelies te identifiseer en hul gedrag te stop.
Volgens Noorskool se woordvoerder Quintin Botha, het leerders ook ‘n teenboelie kontrak onderteken, wat sê dat hulle eerder ‘n ‘buddy’ sal wees, in plaas van ‘n boelie.
