Local news

Gemeenskapsveiligheid die fokus op die Wes-Rand

Die nuwe geïntegreerde veiligheidstruktuur is daarop gemik om groter gebiede meer doeltreffend te beskerm.

Die burgerregteorganisasie AfriForum se afdeling vir gemeenskapsveiligheid het onlangs sy tweede veiligheidsteunkring, oftewel ’n streeksveiligheidsnetwerk (buiten die Suid-Kaap), op die been gebring.

Volgens AfriForum se hoofwoordvoerder vir gemeenskapsveiligheid Jacques Broodryk, is dié steunkring gesetel in die Wes-Rand en sal ’n geïntegreerde benadering tot veiligheid en samewerking oor ’n breë gebied tussen hul buurtwagte in Roodepoort, Randfontein, Krugersdorp, Fochville en Westonaria bewerkstellig.

“Die steunkring is daarop gemik om die buurtwagte van verskillende areas te kry om saam te staan om sodoende groter gebiede te beskerm. Steunkringe wat oor groter gebiede strek sal ons in staat stel om kriminele aktiwiteite op ’n breër gebied te bekamp. So ook kan inligting, soos dié wat met behulp van regstreekse kamera-monitering ingesamel word, wyer gedeel word en die beweging van verdagtes tussen gebiede kan veel beter gemoniteer word. Dit sal ons veiligheidstrukture ook beter in staat stel om misdaadtendense te identifiseer en te ontleed om sodoende voorkomend te kan optree,” het Broodryk gesê.

“Al hoe meer mense besef dat hulle self aktief ’n rol sal moet begin speel om misdaad in hul gemeenskappe hok te slaan. Ons wil dit juis so maklik en doeltreffend moontlik maak vir mense om deel te word van die oplossing en op ’n doeltreffende manier die veiligheid van hul gemeenskappe te verbeter,” sluit Broodryk af.

 
Back to top button