Grace House-inwoners met haarsny bederf
Haarkapper gee terug aan die gemeenskap deur inwoners van die Grace House Upliftment-sentrum se hare te sny.
Inwoners van die Grace House Upliftment-sentrum is onlangs lekker bederf toe Christelle Cloete hul hare gesny het.
Op Woensdag, 5 Mei het Christelle, ‘n haarkapper, en haar man Francis van die Mission 2-organisasie ‘n draai by die sentrum gaan maak. Die Grace House Upliftment-sentrum is ‘n veilige hawe vir families en mense wat geen ander heenkom het nie. Hulle kry dus nie dikwels die geleentheid om hul hare te laat sny nie.
Christelle het vertel dat sy reeds twee keer tevore die inwoners se hare gesny het.
“Mens moet partykeer teruggee, en vir my is dit my tiende. Ek het nie altyd geld om te gee nie maar ek kan my dienste aanbied waar dit nodig is,” het sy vriendelik vertel.
Francis het vertel dat hulle ook op verskeie plekke uithelp met kos en ander noodsaaklikhede.
Die mans, vroue en kinders het geduldig hul beurt afgewag totdat Christelle elkeen se hare gesny het in die styl wat hulle wou gehad het. Die inwoners het te lekker met hul nuwe kapsels gespog.
