K’dorp bejaardes geniet bietjie boeresport
Bejaardes regoor Krugersdorp raak aktief by Emmanuel Bejaarde Tehuis se jaarlikse boeresportdag.
Die Emmanuel Bejaarde Tehuis het onlangs ‘n boeresportdag aangebied vir hul inwoners asook ander tehuise in die gemeenskap.
Volgens die bestuurder van die tehuis, Jan Hamilton, was die doel dat tehuise in die omgewing teen mekaar meeding in verskeie aktiwiteite.
“Almal kon lekker saam kuier en sosialiseer. Die tehuise wat deel was sluit in Môreglans, KCCA, Luipaardsvlei, Residentia Moria en Emmanuel. Ons hou dit elke jaar al vir die afgelope dekade,” het Jan met trots gesê.
Die Krugersdorp News het die dag bygewoon waar die bejaardes hul alles gegee het in onder meer pylgooi, boontjiesakgooi, bal-deur-‘n-hoepelgooi en wasgoedpennetjies knyp.
Daar was ook verskeie eetgoed beskikbaar soos vrugteslaai en toebroodjies. Vir die bejaardes wat ietsie rustiger wou doen, was daar ook kraletjies wat hulle kon ryg.
