EPR-sekuriteit het hul jongste misdaadverslag bekend gestel, en daarvolgens is daar tussen 18 en 24 Oktober 25 voorvalle by die sekuriteitsfirma aangemeld.
EPR-sekuriteit se algemene bestuurder aan die Wes-Rand, Johan Krogh het vertel dat daar drie rowe by wonings by hulle gerapporteer is.
Twee daarvan het Vrydagoggend, 22 Oktober plaasgevind – die eerste een by ‘n huis in Fisherstraat in Krugersdorp-Wes, en die tweede een in Berilstraat in Silverfields.
Die derde een was Saterdagaand, 23 Oktober in Dorpuitsigstraat in West Village.
Daar is ook vyf sake van saakbeskadiging aangemeld waarvan een by ‘n substasie in Tom Mullerstraat in West Village was. Verder is daar sewe diefstalvoorvalle en vier huisbrake by hulle aangemeld.
Ander sake was vir betreding, voertuigdiefstal, bedrog, poging tot diefstal, gesinsgeweld en intimidasie.
Krogh het gesê dat hulle ook ‘n styging in die voorkoms van hekmotordiefstal opgemerk het, veral in die plotareas soos Honingklip en Kromdraai.
Hy het inwoners gemaan om bedag en paraat te wees.
