Ermelo Rugbyklub maak groot opslae – klop Sasol 3 met 66-5
Ermelo het ook 13 drieë aangeteken en in agt doelskoppe geslaag teen Standerton en wedstryd met 81-0 gewen.
Ermelo Rugbyklub het die afgelope twee naweke as oorwinnaars met skitterende tellings van die veld afgedraf.
Die span het Saterdag, 7 Julie teen Sasol 3 op Secunda gespeel en hulle 66-5 geklop.
Volgens die afrigter, mnr. Pierre van Rooyen, het die wedstryd in goeie gees plaasgevind en het die manne van Ermelo van elke geleentheid gebruik gemaak.
Hulle het Saterdag, 14 Julie teen Standerton Rugbyklub te staan gekom. Die wedstryd het op Vaalrivier Skool se rugbyveld plaasgevind.
Ermelo het 13 drieë aangeteken en agt doelskoppe verdoel. Hulle het die wedstryd met ’n telling van 81-0 gewen.
Die span het goed saamgewerk onder leiding van hul kaptein, Vincent Sonnekus. Mnr. Van Rooyen het gesê dat hy goeie leierskap ten toon gestel het tydens Saterdag se wedstryd en streng dissipline onder sy span gehandhaaf het.
Die puntemakers vir die span was Jaco Spies (2), Leonard Venter (1), Hennie de Jager (1), Vincent Sonnekus (1), DC Swart (1), Boer van Niekerk (3), Sindiswa Mbokane (2), Divan Sonnekus (1) en JP le Roux (1).
DC Swart het met ses doelskoppe geslaag en Boer van Niekerk met twee.
Volgens mnr. van Rooyen was dit ’n moeilike besluit om op spelers van die wedstryd te besluit omdat die span ’n fantastiese wedstryd gehad het.
Die voorsitter van Ermelo Rugbyklub, mnr. Jacques Strydom, het Saterdag vir sy klub uitgedraf en mnr. Van Rooyen het gesê dat hy baie goed gespeel het.
Jaco Spies is as die voorspeler van wedstryd aangewys en Divan Sonnekus as die agterspeler van die wedstryd.
Die span se volgende wedstryd vind op 21 Julie op die AJ Swanepoel Stadion op die C-veld plaas. Toegang beloop R10 per persoon.
