ERMELO – Hoërskool Ermelo se landbouwetenskapklas het onlangs ’n praktiese uitstappie na Deon Muller se plaas onderneem waar hulle die kuns van blesbokjag en vleisverwerking gewys is.
Die dag het met ’n uitgebreide les oor geweerinspanning begin en die leerders is touwys gemaak oor hoe om akkuraat te skiet.
Daarna is hulle deur die jagproses geneem, wat met die slag en verwerking van ’n blesbok afgesluit is.
Muller het die klas verskeie vaardighede geleer, insluitende hoe om verskillende snitte uit die karkas te sny.
Die leerders het elke stap in die proses gevolg, van die uitsny van biltong en droëwors tot die hantering van die vleis om die beste kwaliteit produkte te verseker.
Muller het ook sy passie vir sy boomplantasies met hulle gedeel.
Hy het verduidelik hoe hierdie plantasies nie net ekonomies voordelig is nie, maar ook ’n belangrike rol in die bewaring van die omgewing speel.
Deur hierdie ervaring het die leerders ’n nuwe waardering vir die kompleksiteit van landbou en die belangrikheid daarvan om die natuur te beskerm ontwikkel.
“Hierdie uitstappie het nie net praktiese vaardighede verbeter nie, maar het ook tot ’n dieper begrip van die landbou-ekosisteem gelei.
“EHS bedank Muller vir hierdie opwindende ervaring,” het die skoolhoof, Pieter Grobler, gesê.
