Charles en Mari Cook lei ‘n lewe vol avontuur en ontdekking.
Hierdie egpaar het ‘n passie vir reis wat hulle na onverwagte plekke geneem het.
In 2017 het Charles die werksgeleentheid gekry om Israel toe te trek, ‘n besluit waaroor Mari aanvanklik skepties was. Vandag sê sy egter dat sy geen oomblik daaroor spyt was nie.
Vir vier jaar het die egpaar in Israel gewoon en het hulle die Midde-Ooste deur en deur verken.
Hulle is dikwels avontuurlustig en het al menige kilometer geloop nadat hulle ‘n bus verpas het.
Vir hulle was dit net ‘n geleentheid om die omgewing beter te leer ken en hulself in hul tydelike tuiste te verdiep.
“Volgens my foon se stapopsporingstoep het ons in die eerste 10 maande 1 600 km geloop,” sê Charles soos hy met ‘n glimlag aan daardie tye terugdink.
Tydens hulle verblyf in Israel het die egpaar ‘n nuwe liefde ontdek wat hand aan hand met hulle avonture gaan – YouTube. Vir Charles was YouTube ‘n onbekende terrein, maar hy het die uitdaging met ope arms aanvaar.
“Jy is nooit te oud om te leer nie,” sê hy.
Hy het begin om hulle reisavonture vas te lê en het tyd bestee aan die aanleer van sosialemediavaardighede.
Charles het sy opgeneemde materiaal geredigeer en op YouTube geplaas om dit met vriende en familie te deel.
Die oorspronklike doel was om net diegene wat in hulle ekspedisies belangstel, op hoogte te hou. Maar die sosialemediagogga het hom gebyt.
“Daar was ‘n tyd toe ons baie busse as gevolg van foto’s en video’s gemis het,” lag Charles.
Die Covid-pandemie het hulle voor ‘n moeilike besluit geplaas – om te bly of terug te keer na Suid-Afrika.
As Charles en Mari nie besig is om grootskaalse toere in Afrika te onderneem nie, bestee hulle hul naweke aan die bestudering van die plaaslike omgewing.
Hierdie paartjie het intussen twee nuwe lede tot hul reisfamilie verwelkom. Ziva en Jazzy, die Cook-egpaar se skoothonde, reis saam met hulle na enige diervriendelike bestemming.
Die egpaar het nou die doelwit om Suid-Afrika en Afrika te reis en meer mediainhoud op hulle YouTube-kanaal te plaas.
Charles beskryf sy lewensdoel as die afskud van die ‘spoorweg-sindroom’ en om homself uit sy gemaksone te stoot.
Hy en sy vrou het al menige kompromieë gemaak, soos om in ‘n grot in die Drakensberge te slaap of stiekem uit ‘n hospitaal in hul jonger dae te ontsnap om na die Oekraïne te reis.
“Jy wil nie jou passie laat stagneer nie,” sê Charles.
Volg Charles en Mari op YouTube by hulle skakelnaam: https://www.youtube.com/@charlesmariadventures/featured
