Ermelo-polisiekonstabel in hof op aanklagte van kaping
Pogings om die oorblywende verdagtes vas te trek duur voort.
ERMELO – ‘n 35-jarige polisiekonstabel het op 18 Junie in die Ermelo-landdroshof verskyn op aanklagte van motorkaping en die besit van vermoedelik gesteelde eiendom.
Die saak is tot 27 Junie uitgestel vir formele borgtogaansoek, wat geweier is, en die saak is tot 3 Julie uitgestel.
Hoëvelder het berig dat die konstabel op 16 Junie in hegtenis geneem is ná ‘n voorval die vorige dag waarin ‘n 37-jarige man se Volkswagen Polo gekaap is terwyl hy van Lothair na Ermelo op pad was.
LEES HIER: Ermelo-polisiekonstabel op aanklag van kaping in hegtenis geneem
Die voorval is by die Ermelo-polisie aangemeld. ’n Motoropsporingsmaatskappy het die polisie bygestaan deur inligting te verskaf oor waar die gekaapte Polo hom bevind.
Die verdagte wat in hegtenis geneem is, is ‘n polisiekonstabel wat as ‘n hofordonnant by die Ermelo-landdroshof werk.
Pogings om die oorblywende verdagtes vas te trek duur voort.
Owerhede doen ‘n beroep op enigiemand met inligting oor waar hulle is om die Stop Misdaad-nommer by 08600 10111 te kontak of die My SAPD app. Inligting sal vertroulik gehou word en bellers kan anoniem bly.
