ERMELO – ’n Inwoner van Jansenstraat het die Hoëvelder onlangs gekontak oor ’n stormwaterpyp wat in haar inry gebars en vervolgens ’n masiewe gat laat vorm het.
Me. Trudie Neethling het vertel dat sy en haar man die aangeleentheid reeds verskeie kere by die munisipaliteit aangemeld het, maar dat niemand nog uitgekom het om die ingang te herstel nie.
Sy is bekommerd en van mening dat dit ’n gevaar vir motoriste inhou, asook vir voetgangers wat in die aand daaroor stap.
Dit is al bykans twee weke sedert die probleem by die munisipaliteit aangemeld is.
“Een van die inwoners wat hier bly het reeds hulle voertuig beskadig met die gat,” het me. Neethling genoem.
Die Hoëvelder het navrae aan mnr. Mandla Zwane, woordvoerder vir Msukaligwa plaaslike owerheid, gestuur maar nog geen terugvoer ontvang nie.
