Die hartseergesig van dooie visse wat Saterdag, 3 November op die oppervlakte van die Pet Dam gedryf het, het die gemeenskap geskok en met vele onbeantwoorde vrae gelaat.
Dit is tans nog nie bekend wat die visvrektes veroorsaak het nie, maar amptenare van Msukaligwa Rampbestuur is ingeroep om ondersoek in te stel.
Volgens mnr. Mandla Zwane, woordvoerder van die Msukaligwa Munisipaliteit, het die Parkeraad genoem dat die skielike visvrektes moontlik die gevolg is van die skielike afname van die watertemperatuur, maar die uitslae van die toetse is nog nie bekend nie.
Die Mpumalanga en Gert Sibande Departement van Omgewingsake en Natuurbewaring in Lydenburg is genader, wat kundiges ontplooi het om te probeer bepaal wat die oorsaak kan wees.
Tot dusver blyk dit dat slegs die karp-spesies geraak is en nie ander visse soos barber en bass nie. Daar is tot dusver geen negatiewe impak op die voëllewe rondom die Pet Dam opgemerk nie.
Hy het die publiek gewaarsku dat hulle onder geen omstandighede enige van die visse mag eet nie, omdat die oorsaak nog nie bevestig is nie.
Munisipale werkers is Maandag, 5 November instruksies gegee om die visse te verwyder.
“Die munisipaliteit monitor steeds die situasie by die Pet Dam en vra die gemeenskap om enige kontak met die water van die Pet Dam tot verdere kennisgewing te vermy.” het mnr. Zwane afgesluit.
Die Hoëvelder het ook navrae gedoen by die Mpumalanga Toerisme en Parkeringsagentskap, maar geen terugvoering is teen druktyd ontvang nie.
Sien meer fotos hier:
https://highvelder.co.za/71223/gallery-dooie-visse-pet-dam-n-skok/
