Drakensberger-bul gaan vir R145 000 by OTVL Ram- en Bulveiling in Ermelo
Die afslaers vir die veiling was mnr. Paul Botha en mnr. Mike Killassy
Ermelo Vleissentraal het op 24 en 25 Julie ‘n Oos-Transvaalese ram- en bulveiling op die Ermelo-skouterrein aangebied.
Slegs telers wat vooraf gekeur is, het uitnodigings ontvang om hul diere op dié veiling te verkoop. Die diere word op die dag vir ‘n tweede keer gekeur voordat hulle die ring mag binnegaan.
Dit is juis streng maatreëls soos dié wat dié veiling jaarliks van krag tot krag laat gaan en vir kopers die geleentheid bied om op diere van die hoogste gehalte te kan bie.
Die afslaers vir die veiling was mnre. Paul Botha en Mike Killassy.
Hulle het die taak gehad om 217 bulle en 122 ramme vir die hoogste pryse te verkoop.
Slegs 12 bulle en 19 ramme het nie nuwe eienaars gekry nie.
Mnr. Wikus Cloete van Ermelo moes R145 000 uithaal vir die Drakensbergerbul wat die hoogste prys op die veiling behaal het wat deur mnr. Petrus Taljaard van Talmal Drakensberger van Ermelo te koop aangebied is.
Die ram wat die hoogste prys behaal het, is ‘n merino-veldram van mnr. Gert Smit van Vrede wat mnr. Niekie Davel van Hendrinan R38 000 uit die sak gejaag het.
