Helen Zille, nasionale leier van die Demokratiese Alliansie (DA), het Ermeloërs Vrydag toegespreek tydens ’n vergadering by Legends Lodge.
Sy het die publiek ingelig oor die rol wat die DA
in die komende verkiesing speel en het almal versoek om op 7 Mei 2014 hul kruisies by die stembusse te maak.
Dienslewering was ’n onderwerp wat baie aandag geniet het en op ’n vraag of daar hoop is, het sy geantwoord: “Dit is moontlik dat elke persoon basiese dienste kry, maar dit is onmoontlik om vir elke persoon ’n gratis huis te gee.”
Me. Zille het ook gesê die “die regering wat jy het, maak ’n baie groot verskil in jou daaglikse lewe”. Sy het benadruk dat niks alleen
vermag kan word nie en dat alleen deur
saam te staan die nodige veranderinge
kan plaasvind vir ’n beter toekoms
vir die land.
