Personeel van ’n skool op Ermelo, wat per skoolbus na Ermelo onderweg was, is op 11 Februarie – sowat 30km voor eMalahleni (Witbank), aangeval en beroof.
Volgens inligting van Acsu, het die rowers klippe strategies op die pad gepak, wat veroorsaak het dat die bus se motorband gebars het.
Die bestuurder het ‘n ent verder aan gery, waarna hy stilgehou en hy en nog ’n onderwysers het uitgeklim om die motorband om te ruil.
Een van die rowers het skote afgevuur en na bewering sy pistool teen een van die onderwysers se nek gedruk, en hom op die grond neer gegooi.
Die verdagtes het die onderwysers op die bus van hul selfone en handsakke beroof en herhaardelik gevra vir skootrekenaars en vuurwapens.
Een van die onderwysers op die bus het daarin geslaag om met hul foon hulp te ontbied en lede van Acsu-Hendrina het hul na die toneel gehaas.
Met die hulp van noodpersoneel is die bus se motorband omgeruil, en die lede van Acsu het die personeel tot in Ermelo vergesel.
Mnr. Pieter Grobler, skool hoof, het aan die Hoëvelder vertel dat die insident vir almal traumaties was.
“Ons is dankbaar dat almal op die bus ongedeerd is,” het mnr. Grobler gesê.
Hy het bygevoeg dat ‘n sielkundige die personeel Dinsdag sal besoek.
Inwoners sal op hoogte gehou word indien meer inligting bekom word.
