Plaaslike rugbyspelers blink uit
Junior en senior rugbyspelers van Nigel het die afgelope skoolvakansie by verskillende toernooie hul staal op die veld gewys.
Oud-Vossie Wilco Ras is tydens die Danie Rossouw rugbyweek wat gedurende Maart by Hoërskool Rob Ferreira in Witrivier aangebied is, vir die o/19-Barbarian toerspan gekies. Dié span het vanaf 21 tot 30 September na Rusland getoer waar hulle teen verskeie klubspanne in St Petersburg en Moscow gespeel het. Die Barbarianspan, waarvan Ras die kaptein was, het slegs een wedstryd verloor. Hy is ook kaptein van die rugby eerstespan by Hoërskool Vereeniging Gimnasium waar hy tans ‘n matriekleerder is en sê hy oorweeg om sy rugbyloopbaan voort te sit, terwyl hy volgende jaar by Noordwes Universiteit studeer.
SUIKERBOSRAND JEUG RUGBYKLUB
Tiaan Deyzel, Elcher Grung en Louwrens van der Linde van Suikerbosrand Jeug Rugbyklub het vanaf 23 tot 28 September aan die Interprovinsiale Rugbytoernooi in Alberton deelgeneem, waar hulle die veld vir die Valke se o/14 IPT-span opgedraf het. Dié span het ‘n algehele derdeplek by die toernooi behaal.