Die jaarlikse Great Train Race wat op 28 September in Heidelberg plaasgevind het, het soos in die verlede besoekers van heinde en vêr gelok.
Die luukse Rovos Rail stoomtrein het ongeveer 09:45 by die ou Heidelberg Stasie aangekom waar besoekers kon foto’s neem van die nostalgiese trein, wat as een die mees luukste treine in die wêreld beskou word.
Die Heidelberg Great Train Race vind jaarliks in die Suid-Afrikaanse Erfenismaand plaas ter viering van die oorspronklike wedren wat in 1930 ontstaan het toe ‘n Bentley voertuig teen die Franse Blou trein in ‘n wedloop betrokke was.
Sedertdien is die wedloop in verskeie lande en dorpe gevier en Heidelberg het ook vir die afgelope ses jaar die geskiedenis laat herleef.
Daar was geen tekort aan gaste nie en talle besoekers en plaaslike inwoners het op gepaste wyse volgens 1930’s modes opgetof om die geleentheid te vier.
Nadat besoekers die trein besigtig het, het die outydse motors en motorfietse in ‘n ellelange konvooi gery vanaf die stasie na die vliegveld waar hulle die nostalgie van ou voertuie, vliegtuie en motorfietse verder kon beleef.
By die vliegveld het verskeie stalletjies, ou vliegtuie, vertonings en selfs ‘n rit in ‘n helikopter verder vir ’n onvergeetlike dag gesorg.
Die plan was om vliegtuie te sien wat toertjies in die lug uitvoer, maar weens die sterk wind wat gewoed het, is dit afgelas.
