Die Suikerbos Voortrekker Kommando het onlangs ‘n kenteken naweek vir Voortrekkers van verskeie kommando’s van omliggende areas gehad.
Voortrekkers van Vanderbijlpark, Vereeniging, Boksburg, Kempton Park, Johannesburg, Pretoria en Heidelberg was deel van die geleentheid. Die Voortrekkers moes gewerk het om kentekens te verdien.
Almal het oorgeslaap in die ou tronk in Jordaanstraat.
“Die groep het deur die loop van die naweek ook meer geleer oor plaaslike sowel as nasionale en internasionale gedenkwaardighede wat museums en gedenk standbeelde insluit.
Daar was verder besoeke aan die bakoond, Klipkerk, Laer Volkskool, die stadsaal, die ou stasie en die AG Visser huis.
“Daar was ook ‘n nagtelike besoek aan die Kloof begraafplaas om die eerste inwoners van Heidelberg te besoek en beter te leer ken,” het Dawie de Villiers van Suikerbos Voortrekker Kommando, tong in die kies vertel.
Die Voortrekkers was in ses spanne ingedeel om die besienswaardighede te besoek en leidrade op te volg vir blokkiesraaisels wat hulle moes voltooi.
Daar was ook take by elke monument wat uitgevoer moes word.
Kundiges soos Willem J Pretorius en Frik van Niekerk (SAWV, Eenheid Suikerbos) asook Bouwe Wiersma van Heidelberg Heritage Museum was byderhand om die besoekers meer te vertel van Heidelberg se geskiedenis en die bewaring van die monumente.
“Hopelik is daar met die naweek se aktiwiteite ‘n saadjie by die kinders geplant sodat hulle nuuskierig sal word oor geskiedenis en wat dit alles beteken,” het de Villiers gesê.
Hy het ook die MOTHS bedank vir die beskikbaarstelling van die ou tronk as slaapplek vir die groep.