Konsternasie toe beeste in dorp wei

'n Trop beeste in die middel van Heidelberg se dorpsgebied het inwoners warm onder die kraag.

Hein Herbst (9) het gaan kyk wat aangaan toe 'n trop beeste langs die Blesbokspruit in Maréstraat kom wei het.

Konsternasie het hom op 30 Oktober in Maréstraat afgespeel toe motoriste skielik vir ‘n trop beeste by die laagwaterbrug moes uitswaai.

Die trop beeste (met hul veewagter en ‘n paar honde) het doodluiters oor die straat na die groen gras langs die Blesbokspruit beweeg, waar hulle water gedrink en gewei het.

HERAUT het Trompie van Wyk van Lesedi Plaaslike Munisipaliteit se hulp ingeroep, waarna die beeswagter aangesê is dat dit onwettig is om sy vee in dorpsgebied te laat wei. Hy het toe die gebied verlaat en in die rigting van Shalimar Ridge en Ratanda beweeg.