Mooi in die oortreffende trap.
Die bladrose staan netjies, ry op ry, onder skadunet gepak op Len en Anette Robberts se plaas net buite Modimolle.
Die plante met hul dik, vlesige blare is nie juis noemenswaardig nie, maar hul flambojante, kleurvolle blomme is so helder dit sal ’n reënboog laat bleek voel. Die name is beskrywend: Orange Moon, Spanish Gold, die bloedrooi en pers Dracula en Ivan the Terrible, King Midas en Good as Gold.
Len het bladrose begin versamel om hom besig te hou ná sy aftrede. Die egpaar het twee jaar gelede vanaf Hectorspruit naby Komatipoort verhuis.
Len se versameling bestaan reeds uit meer as 300 verskillende plante. Hy hou noukeurig boek van elkeen se korrekte naam, want die verskille is soms klein. Vir van die plante moet hy geduldig wag dat hulle eers blom sodat hy die naam kan vasstel. Hy het reeds vier ringbinders volgepak met foto’s en beskrywings van dié besondere blomme.
“My ma het altyd bladrose gehad en ek was altyd gefassineer deur die blomme se helder kleure.”
Hy het ’n ruk gelede ’n groot aantal plante van ’n bladrooskweker in Johannesburg aangeskaf.
Die plante is netjies in tuisgemaakte houers van draad en skadunet geplant omdat hul wortels goed moet dreineer.
“Dit maak my moedeloos as die plante siek word. Soms kry hulle kraagvrot, maar ons kry ook koue-skade. Dit is nie aldag maklik om ’n deel van die blaar wat afgesny is aan die groei te kry nie,” het hy gesê.
Die satisfaksie as die plant ’n mens wel beloon met ’n blom bykans so groot soos ’n bord, is egter groot.
Een van die plante, ’n Epiphyllum stenopetalum, was besonders produktief en het 28 wit blomme gedra. Van die plante se blomme maak slegs snags oop, vandaar die bynaam aandblom. Daar is egter verskeie ander plantsoorte wat snags blom en dan dié naam in die volksmond gekry het.
Die draakvrug behoort ook aan die Epiphyllum-familie. Anette is net so ’n geesdriftige tuinier. Oral in die tuin wink spatsels kleur. Die groen en geel clivias staan gelukkig onder die bome, terwyl die amarille en lugplante welig blom.