Plant solank pitte vir gewilde Goliat van Gat-pampoenfees
Die tyd het weer aangebreek vir die eerste voorbereiding vir deelnemers aan die jaarlikse Goliat van Gat-pampoenfees — ’n jaarlikse projek van TLU SA.
![](https://images.caxton.co.za/wp-content/uploads/sites/134/2020/10/11a-780x470.jpg)
’n Hele aantal Bela-Bela-inwoners het reeds grond omgespit en die uitgesoekte pampoenpitte geplant ter voorbereiding van aanstaande jaar se kompetisie.
“Ons herinner graag al ons voornemende deelnemers om nou met grondvoorbereiding te begin en die pitte te koop vir 2021 se kompetisie,” het Henri Combrink, organiseerder, gesê. “Die pitte is by TLU se hoofkantoor in Silverton beskikbaar, maar kan ook landwyd afgelewer word.”
Die pitte is in Bela-Bela by plekke soos Peet se Padstal en die Waterberg DLU se kantoor beskikbaar. Die 2021 Goliat van Gat-fees sal weer in Pretoria aangebied word en deelnemers kan in die volgende kategorieë deelneem: Grootste pampoen, grootste pampoen in Gauteng, mooiste pampoen, lelikste pampoen, junior pampoenkweker onder 16 jaar, oorspronklikste pampoen in die versierde pampoene-afdeling, asook in die grootste ander groentegewasse-kategorie.
Die wenner van die grootste pampoen ontvang R15 000 kontant en die wenner van die grootste pampoen in Gauteng ontvang R3 000.
Die naaswenner, wat in die grootte-kategorie op nasionale vlak meeding, ontvang R5 000 en die derde plekwenner sal R3 000 in die sak steek.
Meer besonderhede in aanloop tot die geleentheid sal teen Maart aanstaande jaar beskikbaar gestel word.
Vir navrae oor die kompetisie kan mense vir Combrink bel by tel. 082 552 9428 of e-pos stuur na culliboer@gmail.com(.)
Belangstellendes kan ook vir Sylvia Higgins van die Waterberg DLU bel by tel. 071 847 4161 of die fees se Facebook-blad besoek.