Hansies sluit wintersport op ’n hoë noot af
Lebu van Heerden, Hoërskool Hans Strijdom in Mookgophong se adjunkhoof vir sport, is trots op die goeie uitslae wat die Hansies by die Sewes Blitzfees behaal het.
![](https://images.caxton.co.za/wp-content/uploads/sites/134/2022/09/11b-1-780x470.jpg)
Die rugbydag is op Saterdag 3 September by Pietersburg Hoërskool gehou.
Die spanne het meegeding om vier trofeë, beker, plaat en skild.
Twee van die skool se rugbyspanne, die o.17A- en o.15A-spanne, het in hulle onderskeie ouderdomsgroepe die plaat-afdeling gewen. Albei spanne het teen Hoërskool Frans du Toit in die finaal gespeel. Die o.15 B-span het die skild gewen en het teen Hoërskool Ellisras in die finaal gespeel.
![](https://images.caxton.co.za/wp-content/uploads/sites/134/2022/09/11a-1-534x800.jpg)
“Die seuns het baie goeie rugby gespeel en ons is veral trots op Marcus van der Walt, Neville Barnard, Tiaan du Plessis en AJ Loots,” het Van Heerden aan Die Pos gesê.
Die Hansies se hokkiebokkies het ook op 2 September aan die Blitzfees, Pietie Makietie deelgeneem. Nie minder as 49 hokkiespanne uit Limpopo het aan hierdie “Quick 6” deelgeneem en tagtig wedstryde is gespeel. Die toernooi is in twee ouderdomsgroepe, o.15 en o.17 verdeel.
Op dieselfde dag het die o.15-krieketspan hulle wedstryd teen Hoërskool Ben Viljoen gewen. Die Hansies se tennisspan het ook die seisoen afgesluit met `n 10-7 oorwinning teen Hoërskool Piet Potgieter in Mokopane.
![](https://images.caxton.co.za/wp-content/uploads/sites/134/2022/09/11c-1-800x594.jpg)
![](https://images.caxton.co.za/wp-content/uploads/sites/134/2022/09/11d-1-800x543.jpg)